ఆంధ్ర రాష్ట్రం

ఆంధ్ర రాష్ట్రం, తెలంగాణ అనే అచ్చ తెలుగు పేర్లున్న రెండు రాష్ట్రాలను కలిపి ఆంధ్ర ప్రదేశ్ అనే హిందీ పేరు పెట్టేసారు ఆనాటి ఢిల్లీ పలకులు. మరిప్పుడు తెలంగాణాను మళ్లీ విడగొట్టాలని నిర్ణయించిన వారు ఇప్పటికైనా ఆంధ్ర రాష్ట్రం అనే తెలుగు పేరును పునరుద్ధరిస్తారా?

అలాగే శంషాబాద్ విమానాశ్రయానికి పేరు మార్చి ఏ పి.వి. నరసింహారావు పేరో పెట్టే ధైర్యం ఈ నాటి తెలంగాణ వీరులు చేయగలరా?

మేఘ మందసం

మొన్న ఒక సమావేశంలో cloud computing గురించి మాట్లాడుకుంటూ మన సమాచారాన్నంతా మేఘాలలో దాచుకోవటం, తిరిగి ఎక్కడినుంచైనా దానిని పొందగలగటం వంటి విషయాలు వింటున్నపుడు చిన్నప్పుడు విన్న తమాషా కథ ఒకటి గుర్తుకు వచ్చింది.

ఒకప్పుడు ఆకాశం చాలా తక్కువ ఎత్తులో ఉండేదిట. ప్రజలందరూ తమ డబ్బుని, ఇంకా విలువైన ఇతర వస్తువులని అటక మీద దాచుకున్నట్టు మబ్బుల పైన దాచుకునే వారుట. ఒకసారి ఒక పెద్ద దొంగల ముఠా ఆ సంపదనంతా దోచుకోవాలని వస్తే, ఆ విషయం తెలుసుకున్న ప్రజలు రాళ్ళతో కొట్టి కొట్టి ఆకాశాన్ని పైకి పంపేసారుట.

చిట్టి డైరక్టర్

ఆ మధ్యన ఒక రోజు మా అమ్మాయిని బయట లాన్లో ఆడిస్తున్నాను. ఉన్నట్టుండి నాన్నా నీకో కథ చెప్పనా అంది. సరే చెప్పమంటే ఇలా చెప్పింది:

"అనగనగా ఒక చిన్న జిరాఫీ పిల్ల ఉంది. దానికి ఒకసారి చాలా ఆకలి వేసి చెట్టు నుంచి చాలా పళ్ళు కోసుకుని తినేసింది. అప్పుడు దాని పొట్ట పెద్దగా అయిపోయింది. అది ఇంటికి  వెళ్ళి వాళ్ళ అమ్మ నాన్నలకి నమస్కారం పెడదామంటే పొట్ట పెద్దదవటం వల్ల కుదరటం లేదు. చాలా కష్టపడి పెట్టింది కానీ ఇంతలో దాని పొట్ట పగిలిపోయి అందులోంచి పళ్లన్నీ కింద దొర్లిపోయాయి. అప్పుడు వాళ్ళ నాన్న జిరాఫీ ఒక పాముని తెచ్చి దాని పొట్టకి బెల్టు లాగా పెట్టి కుట్టేసాడు."

ఎప్పుడో ఆరు నెలల క్రితం చెప్పిన వినాయకుడి కథను అది అంత బాగా గుర్తు పెట్టుకున్నందుకు సంతోషించాలో లేక దేవుళ్ళ పాత్రలను జిరాఫీలుగా మార్చేసినందుకు ఏడవాలో తెలియలేదు. బహుశా ఇలాంటివాళ్ళే పెద్దయ్యాక తెలుగు సినిమా దర్శకులు అవుతారేమో.